பாலை நிலத்துக் காதல்

தமிழ் ஊடகங்களில் பெண்கள் மீதான சாதி மற்றும் குடும்ப அமைப்பின் பண்பாட்டு வன்முறை

அ.ஆரோக்கியராஜ், முனைவர் பட்ட ஆய்வாளர்,

இதழியல் மற்றும் தொடர்பியல் துறை, சென்னைப் பல்கலைக்கழகம்.

arockia.raj49@gmail.com

அறிமுகம்:

மனித குல வரலாறு என்பது போர் மற்றும் காதலின் மீது எழுதப்பட்ட ஒன்று என கிரேக்கத்து ஹோமர், சீன செவ்வியல் இலக்கியங்கள், சங்க இலக்கியங்கள், இராமாயணம் போன்ற உலகின் பல இலக்கியங்களில் இருந்து அறிய முடிகின்றது. தொல்காப்பியம் தமிழர் வாழ்வுதனை அகம் புறம் என இரு பெரும் பிரிவுகளாக பகுத்துள்ளது. உளவியல் அறிஞர்கள் மனித மனத்தினை வன்மமும் காமமும் கலந்த ஒன்று என கூறுகின்றனர். மனித உணர்வுகளில் மிக மெல்லிய உணர்வாக காதலையும், முரட்டுத்தனமான பெருமைபடக்கூடிய ஒரு செயலாக வீரத்தினையும் இலக்கியங்கள் படம் பிடித்துக் காட்டுகின்றன. தமிழர் வாழ்வில் இவைதான் முதன்மையா? இவை இரண்டு உணர்வுகள் மட்டும் முதன்மையாக பேச என்ன காரணம்? காதல் எனும் உணர்வு எவ்வாறு சமூக அரசியல் தளத்தில் இன்று வரை ஒரு முக்கிய கருத்தியல் வடிவமாக இருந்து வருகின்றது? மனிதக் காதல் எவ்வாறு பக்திக்காதலாக மாற்றப்படுகின்றது? காதல் எனும் உணர்வு மனித வாழ்வினை ஒரு அமைப்புக்குள் எவ்வாறு கொண்டு வருகின்றது? குடும்ப அமைப்பின் உருவாக்கத்தில் கூடவே இணைத்து வருகின்ற சாதி, அரசு அதிகார ஆதிக்கத்திற்கு காதல் எவ்வாறு ஒரு அடிப்படை உணர்வாக அமைகின்றது என்பன போன்ற கேள்விகள் தமிழர் வாழ்வியலை இன்னும் மிக நுட்பமாக அறிந்து கொள்ள உதவும்.

வீரம் காதல் என்ற இரு உணர்வுகளும் ஒன்றுடன் ஒன்று இயையுடையது. இவை இரண்டும் அரசு உருவாக்கத்திற்கு மிக அடிப்படையாக விளங்குகின்றது. வீரம் எனும் உணர்வு காதலைச் சார்ந்து தான் இருக்கின்றது. ஆக அரசு-அதிகார கட்டமைப்பில் மிக முக்கியமான காரணியாக காதல் எனும் உணர்வு இருக்கின்றது. காதல் எனும் சொற்பதம் “அன்பு, பற்று, பாசம், நேசம், நட்பு, காம இச்சை, பக்தி, வேட்கை, ஆவல், பற்றார்வம், காதலணங்கு, அன்புச்செய்தி, காதல் நினைவூட்டு, காதல் தொடர்பு, காதலாட்டம், காதல் தெய்வம், மதவேள், அன்புகொள், பாசங்கொள், நேயமுறு, காதல்கொள், காதலி, விரும்பு, அன்புடன் பேணு, பெற்றுமகிழ், நுகர்ந்து மகிழ், ஈடுபாடுகொள், நாட்டங்கொள், சார்புகொள், விரும்பிப்பயில்” ஆகிய பொருட்களை தருகின்றன என அகராதி குறிப்பிடுகின்றன. (விசயகுமாரன், 2012)

சங்க இலக்கியம் தொடங்கி கவிதை, சிறுகதை, புதினம், நாவல், திரைப்படங்கள், செய்தி ஊடகங்கள், இணையம் ஆகிய அனைத்து வகையான தொடர்பியல் ஊடகங்களிலும் காதல் ஒரு பேசு பொருளாக இருக்கின்றது. அந்த காதல் மனித வாழ்வினை எந்த அளவுக்கு பிரதிபலிக்கின்றது என்ற கேள்வி மிக அவசியமானதாகின்றது. காதல் எனும் உணர்வினைப் போல அது குறித்த பிரதிபலிப்புகளும் அரசின் ஒரு பண்பாட்டு அதிகார வளையத்திற்குள்ளேயே இருந்து வருகின்றது. இன்று காதல் குறித்த வன்முறைகள் எவ்வாறு ஒரு அரசியல் செயல்பாட்டின் ஒரு வடிவமாக இருக்கின்றது. உதாரணமாக சாதி ஒழிப்பு பேசுபவர்கள் காதலின் பொருட்டு நிகழ்த்தப்படும் ஆணவக்கொலைகளை கண்டித்தும், சாதி அமைப்புகள் காதலினை நாடகக்காதல் என்றும் கூறுகின்றனர்.

காதல், வன்முறை, ஆன்மீகம், சமயம், சாதி, நவீனம், முதலாளித்துவம் ஆகியவற்றிற்கிடையே மிக நெருக்கமான தொடர்பு உள்ளது. இதனை இன்று உள்ள திரைப்படங்கள், செய்தி ஊடகங்கள் வாயிலாக அறிய முடிகின்றது. இறைபக்தி, சாதி மறுப்புத்திருமணம், ஆணவக்கொலைகள், வணிக வளாகங்களில் கொண்டாடப்படும் காதலர்தினங்கள், இணையக்காதல்கள், காமம், கள்ளக்காதல், கொலை ஆகியனவற்றிற்கான தொடர்பு என்பது ஒரு காதலின் அரசியல் செயல்பாட்டு தொகை வடிவமாக இருக்கின்றது. இன்று ஊடகங்களில் காதல் பற்றிய செய்திகள் என்பன காதல் திருமணம் செய்தவர்கள் வெட்டிக்கொலை, காதலிக்க மறுத்த பெண் மீது வன்முறை (வெட்டிக்கொலை, அமிலம் வீசுதல், கடத்தி பலாத்காரம் செய்தல்) கள்ளக்காதல் காரணமாக கொலை என இவ்வாறாகத்தான் இருக்கின்றது.

காதல் எனும் கருத்தியல்:

காதல் என்பது இன்னொரு உயிரின் இருப்பினை ஏற்றுக்கொள்வது, நேசிப்பது. அதன்மீது ஆதிக்கம் செலுத்துவது/பணிந்து போவது. ஆக காதல் என்பது இந்த உலகில் தன்னுடைய இருப்புக்கும் இன்னொரு உயிரின் இருப்பிற்குமான விழைவே ஆகும். ”ஒரு மரத்தில் இருக்கும் கூட்டைப் போல, கூட்டில் வாழும் பறவை போல. பறவை பறக்கும் ஆகாயம்” என இயற்கையின் இத்தகைய பிரம்மாண்ட காட்சிகள் ஒவ்வொன்றும் இன்னொன்றின் இருப்பினை ஏற்றுக்கொண்டுதான் இருக்கின்றன என்று உணர்த்துகின்றது. ஆனால் இன்று மனிதன் உருவாக்கி வைத்திருக்கும் பிரமாண்டம் என்பதே அதிகாரம் சார்ந்த விஷயம். சமயம், சாதி, பெருவணிகம் என்ற அதிகார மையங்கள் இன்றைய பிரமாண்டங்களை உருவாக்குகின்றது. இந்த பிரமாண்டங்கள் இன்னொரு உயிரின் இருப்பையும் வாழ்வையும் கேள்விக்கு உள்ளாக்குகின்றன. (தொ. பரமசிவன், சமயம்:16) (ரஸ்ஸல், பெர்ட்ரண்ட்) காதல் எனும் உணர்வு இன்னொரு உயிரின் இருத்தலின் பொருட்டு உருவாகும் விழைவு மட்டுமின்றி அது ஒரு அதிகார அமைப்பின் ஒரு உணர்வியல் உருவகம். அது சமூக பண்பாட்டு தளத்தில் மிக முக்கியமான அரசியல் வடிவமாக உள்ளது. ஆக காதல் என்பதை இருபாலர்களுக்கு இடையே ஏற்படும் இணக்கம், கவர்ச்சி, பற்று என்று மட்டும் புரிந்துகொள்ளாமல் அதனை அரசியல் தொகைப்பாட்டின் வடிவமாகக் கருதவேண்டும்.

காதல் கொண்டவர்களை ’காதலில் விழுந்துட்டாங்க’ என கூறுவது வழக்கில் உள்ள சொல்லாடலாகும். ‘தேவதையைக் கண்டேன், காதலில் விழுந்தேன்’ எனத் தொடங்கும் திரைப்பாடல் போன்றவை கவனிக்கத்தக்கது. விழுவது என்பது தனது சுயகட்டுப்பாடு இன்றி பலவீனமடைந்து வீழ்வதாகும். ஆக காதல் என்பது அவ்வாறாகவா இருக்க வேண்டும்? காதலில் விழுந்து விடாமல், தன்னுள் இருக்கும் காதலை அறிவது எப்படி என சிந்திக்கவேண்டும் என ஜிஷெக் (2016) கூறுகின்றார். கீழைத்தேய மரபில் தன்னுள் இருக்கும் காதலை அறிதல் என்பது இறைக்காதல் என்ற நிலையில் இருக்கின்றது. ஆண்டாள் திருப்பாவை, பாரதியார் பாடல்கள் என பல தமிழ் இலக்கியங்களில் உள்ளன. தன்னுள் இருக்கும் காதலை அறிதல் என்பது இறைக்காதலாக உருமாறுகின்றது. நடைமுறையில் அந்த காதலுக்கு தடைகள் எதிர்ப்புகள் உருவானதின் காரணமாக, நீதியற்ற செயல்கள் ஆகியவை அதை இறைத்தன்மையாக மாற்றுகின்றன. மதுரைவீரன், காத்தவராயன் போன்றோர் கதைகள் இதற்கு சான்று.

இன்னொரு புறம் பெண்களை துரத்தி துரத்திக் காதலிக்கும் போக்கினை தமிழ்த்திரைப்படங்களில் தொடர்ந்து காட்சியாக்கப்பட்டு வருகின்றன. பெண்கள் வேணாம்னு சொன்னா வேணும்னு அர்த்தம் என்பது போன்ற மனநிலையை பொது தளத்தில் உருவாக்கியுள்ளது. அதற்கு  இந்த சமூக அமைப்பும் ஒரு பின்புலக்காரணியாக இருக்கின்றது. பெண் என்பவள் அச்சம், மடம், நாணம், பயிர்ப்பு உடையவளாக இருக்க வேண்டும் என்ற எண்ணமும் இதற்கு காரணமாகின்றது. ஆனால் ஒரு பெண் ‘என் பின்னால் வராதே’ என்று சொன்னால் கூட அதை எதிர்மறையாக புரிந்து கொண்டு அந்த பெண்ணை தொடர்ந்து பின்தொடர்வது. அதையும் மீறி அந்த பெண் அறைந்தாலோ காவல் நிலையத்தில் புகார் தெரிவித்தாலும் ‘மோதல்ல தான் காதல் ஆரம்பிக்கும்’ ‘இன்னைக்கு அடிக்கிற கைதான் நாளைக்கு அணைக்கும்’ என்பன போன்ற மனநிலையை திரைப்படங்கள் பொதுபுத்தியில் உருவாக்கி இருக்கின்றது.

தமிழ் ஊடகங்களில் காதல், வன்முறை:

சமகாலத்திய தமிழ் ஊடகங்களில் காதல் குறித்த சித்தரிப்பு எவ்வாறாக உள்ளது என்ற புரிதலுக்கு தமிழ்சமூக வரலாற்றின் பின்புல அரசியலையும் புரிந்துகொள்வது அவசியமாகின்றது. காதல் என்பது பெண்ணின் மீது ஒரு குறிப்பிட்ட சமூகத்தின் மீது ஒடுக்குதலை நிலைப்படுத்தி அரசு தன்னை ஒரு அதிகார நிலையிலேயேயும், மக்களை ஒரு பதற்ற நிலையுடனும் வைத்திருக்க முயல்கின்றது. இன்று பெண்களுக்கு எதிரான வன்முறை குறித்த செய்திகள் தினமும் ஊடகங்களில் இடம்பெற்று வருகின்றன. அதை ஊடகங்கள் எவ்வாறு செய்தியாக்குகின்றன, ஆதிக்க மனநிலை கொண்ட சமூகம் அதை எவ்வாறு உள்வாங்குகின்றது. பொதுத் தளத்தில் அது உருவாக்கி இருக்கும் கருத்து நிலை என்ன? என்பன போன்ற கேள்விகள் விவாதத்திற்கு உரியன. அதில் ஊடங்களில் கையாளப்படுகின்ற சொல்லாடல்களின் அரசியல் என்பது ஆதிக்க மனநிலையின் வெளிப்பாடாகத்தான் இருக்கின்றது.

கற்பழிப்பு என்பதனை வன்புணர்வு என்றும், கௌரவக் கொலைகளை ஆணவக் கொலை என்றும், ஒருதலைக் காதலை, துரத்தி துரத்தி காதலித்தலை (Stalking) வன்தொடர்தல் என்ற சொற்றொடர்கள் தற்போது பயன்படுத்தப்பட்டு வருகின்றன. இருப்பினும் விபச்சார அழகி, கள்ளக்காதல் போன்ற சொற்றொடர்கள் ஊடகங்களில் பயன்படுத்தப்பட்டு வருவது குறிப்பிடத்தக்கது.

நிலவுடைமை சமுதாயம் உருப்பெற தொடங்கியதன் அடிப்படையாக, குடும்பம், கற்பு, பெண்ணின் புனிதம் போன்ற கருத்தாக்கங்கள் உருப்பெறத் தொடங்கின. நிலம், பெண் ஆகியன ஒரு சமூகத்தின் வாழ்வாதாரம், வளமை ஆகியனவாக கருதப்பட்டு அதன்மீது ஆதிக்கத்தை நிலைநாட்ட அகமண முறை காரணமாக அமைந்தது. சமூகத்தில் ஒரு ஒழுங்கை உருவாக்க முயன்றது. இன்ன சாதியினர் இன்ன சாதியினரோடு தான் உறவு கொள்ள வேண்டும் என்ற ஒழுங்கு. ஒழுங்கு என்பதே வன்முறை பொதிந்த ஒரு கருத்தியல் ஆகும். (கு. காரல்மார்க்ஸ், 2016) ஒரு பண்பாட்டில் எங்கு ஒழுங்கிற்கான தேவை உருவாகின்றதோ அங்கு இலக்கியங்கள் உருவாகின்றன. அவ்வாறு உருவான இலக்கியங்களின் தொடர்ச்சியாக இன்றைய ஊடகங்களும் திரைப்படங்களும் இருக்கின்றன.

இங்கு காதல் அரசியலின் தொகை வடித்தினை மூன்று பகுதிகளாக காணலாம்.

1. ஆண் திமிர்: ஆதிக்க எண்ணம் கொண்ட ஆண் மனநிலையும் கிட்டதட்ட இதே நிலையில் செயல்படுகின்றன. அதன் காரணமாக தன்னை பிடிக்காத பெண்ணை துரத்தி துரத்திக் காதலிப்பது, அமிலம் வீசுதல், கொலை செய்தல், கடத்தி வன்புணர்வு செய்தல் போன்ற வன்முறை சம்பவங்கள் நடைபெறுகின்றன. இந்திய சமூக மரபில் பெண் என்பவள் ஆணுக்கு அடுத்த படிநிலையில் இருப்பவள். ஆக ஒரு ஆண், ’பெண்ணை தன் விருப்பத்திற்கு ஏற்றார் போல விரும்பலாம் காதலிக்கலாம், அந்த பெண் விரும்பவில்லை என்றபோதும்’ என்ற மனநிலை இருக்கின்றது. காதல் என்பது சமத்துவத்தை உருவாக்க வேண்டும். மாறாக  வன்முறையை உருவாக்கக் கூடாது. ”உயிர்கள் யாவும் தம்தம் உரிமைகளையும், தேவைகளையும் பிறர் தடையின்றியும் பிறர்க்கு இடையூறு இன்றியும் பெறுவதும், ஒரு உயிர் மற்றோர் உயிர்க்கு உதவியாக வாழ்தலுமாம்” என பெரியார் ஈ.வெ.ரா. (22.01.1928) கூறுகின்றார். பெரியார் கூறுவது போல அழியட்டும் ஆண்மை என்பதே சமூகநீதியையும் சுயமரியதையையும் சமூக விடுதலையையும் உருவாக்கும் வழியாகும்.

2.சாதி: குறுந்தொகைப் பாடல் கூறும் ‘யாயும் யாயும் யாராகியரோ’ என்று இருந்த காதல் சாதியப் படிநிலை உருப்பெற்ற பின்பு காதல் திருமணங்கள் செய்வது என்பது சாதிஅமைப்பிற்கு, அவமானமானதாக கருதப்பட்டு பெற்றோர்களே தம்பிள்ளைகளை கொலை செய்யும் நிகழ்வுகள் நடைபெற்று வருகின்றன. இதனை சாதி அமைப்புகள் தொடர்ந்து ஊக்குவித்து வருகின்றன. ஜீன்ஸ் பேண்ட் போடுவதானால் தம் வீட்டு பெண்கள் மயங்கி விடுகின்றனர். கூலிங்கிலாஸ் போட்டு காதல் நாடகம் போடுகின்றனர் என்ற அரசியல் தலைவர்கள் கூறுகின்றனர். காதல் திருமணங்கள் நீண்ட நாட்கள் நீடிக்காது, விரைவில் பிரிந்து விடுகின்றனர். என்பன போன்ற காரணங்களை சாதி அமைப்புகள் முன்வைக்கின்றன. ’காதலிக்கலைனா பையன் வெட்டுறான், காதலிச்சா அப்பன் வெட்டுறான்’ என பெண்களுக்கு இரு வடிவங்களிலும் ஆபத்து இருந்து  கொண்டே இருக்கின்றது. சாதியும் மதமும் மனித குலத்திற்கு எதிரானது என்ற சிந்தனை எல்லோரிடமும் உருவாகுவது இன்றைய தேவையாகின்றது.

3. குடும்ப அமைப்பு: சாதியின் தொடர்ச்சியாக குடும்ப அமைப்பு இருந்து வருகின்றது. கணவன் எப்படிபட்டவனாய் இருந்தாலும் திருமணமான பின்பு பெண் என்பவள் எல்லாவற்றையும் சகித்துக்கொண்டு அவன் கூடவே வாழ்ந்தாக வேண்டும். கல்லானாலும் கணவன் புல்லானாலும் புருசன் என்ற சொல்லாடல் குறிப்பிடத்தக்கது. குடும்ப அமைப்பினை புனிதப்படுத்த இங்கு காதல் கள்ளம் கற்பிக்கப்படுகின்றது. ஒரு  பெண் ஒருவனை காதலிக்கிறாள். இந்த விடயம் வீட்டினருக்கு தெரியவர உடனே அவர்களின் உறவுக்கார பையனுக்கு அப்பெண்ணை உடனே திருமணம் செய்து  வைத்து விடுகின்றனர். இனி அந்தப் பெண் தனது காதலனை காதலிக்கக்  கூடாது என்ற கருத்தியலை சாதிய குடும்ப அமைப்பு உருவாக்கியுள்ளது. இந்த ஆதிக்க மனநிலையின் ஒரு வெளிப்பாடுதான் எதையும் விசாரிக்காமல் கள்ளக்காதல், கள்ளத்தொடர்பு என செய்திகள் வருகின்றன. அங்கு நடைபெற்ற கள்ளத் திருமணங்களையோ, குழந்தை திருமணத்தையோ ஊடகங்கள் மூடிமறைக்கின்றன. அந்த ஏழு நாட்கள், மௌனராகம், ராஜா ராணி போன்ற படங்கள் காதலைவிட குடும்ப அமைப்பு புனிதமானது என்ற ஆதிக் ககருத்தியலை உருவாக்கிய திரைப்படங்களில் குறிப்பிடத்தக்கன.

இறுதியாக:

அன்றாடம் செய்தித்தாள்களிலும் ஊடகங்களிலும் இடம்பெறுகின்ற செய்திகளில் கணிசமான அளவு பெண்கள் மீதான வன்முறைகளாக உள்ளது. இன்று தமிழ் ஊடகங்கள் அதனை ஒரு கவர்ச்சியூட்டும் ஒரு வியாபார யுக்தியாகவும் சாதி சமய ஆதிக்க கருத்துகளை திணிப்பதாகவும் இருக்கின்றன. பாலியல் தொல்லை, ஆபாசபடம், விபச்சாரஅழகி, பலாத்காரம், உறவுக்கு இணங்க மறுத்தல் போன்ற சொல்லாடல்களை தினமலர், தினத்தந்தி உள்ளிட்ட இன்றைய தமிழ் ஊடகங்களில் காண முடிகின்றது. இந்த மாதிரியான சொல்லாடல்கள் என்ன சொல்ல வருகின்றன. அந்த செய்திகளின் உண்மைத் தன்மையைக் குறிப்பிடாமல் இத்தகைய கவர்ச்சிகரமான வார்த்தைகள் வாசகர்களை கவர பயன்படுத்தப்படுகின்றன.

இங்கு மதமும் சாதிய படிநிலைகளும் தொடந்து ஆட்சி செலுத்துகின்ற இச்சமூகத்தில் காதல் என்பதே ஒரு அரசியல் தொகை வடிவம்தான். அதனால்தான்  தெய்வீகக் காதல் என்பன போன்ற கருத்துநிலைப்பாடு இங்கு இருக்கின்றது. அந்த தெய்வீகக் காதல் செய்த ஒரு பெண்ணை சாதியை காரணம் காட்டி வேறு ஒருவருக்கு திருமணம் செய்து வைத்த பிறகும்கூட அந்த பெண் தன் காதலன் மீது காதல் வயப்பட்டால் அது கள்ளக்காதலாக மாற்றமடைகின்றது. இங்கு குடும்ப அமைப்பின் புனிதத்தினை காக்க காதலின் மீது களங்கம் கற்பிக்கப்படுகின்றது. குடும்ப அமைப்பு என்பது அரசின் அதிகார மையத்தின் மிக முக்கிய காரணியாக உள்ளது. இது பெண் அடிமைத் தனத்தையும் சாதியப் படிநிலைகளையும் தொடர்ந்து நிலைப்படுத்துவனாக இருக்கின்றன.

காதல் என்பது அன்பை உருவாக்காமல் குற்றங்களையும் கொலைகளையுமே இன்று உருவாக்கியுள்ளது. பாலை நிலத்தில் வறுமை ஏற்பட்டால் அங்கு குற்றங்கள் அதிகரிக்கும் என திணைக்கோட்பாடு கூறுகின்றது. இன்றைய தமிழக சூழலில் காதல் குறித்த குற்றங்கள் தொடர்ந்து அதிகரித்துக் கொண்டே இருக்கின்றன. இன்றைய தமிழர் மனத்தில் காதல் என்ற உணர்வு மட்டும் தனித்து பாலை நிலத்தில் இருக்கின்றது. மக்களும் மனிதமும் சவநிலையில் இருக்கின்றன.

துணைநூற்கள்:

பெரியார் (2010) அழியட்டும் ஆண்மை, பெரியார் திராவிட கழக வெளியீடு

கா. விசயரத்தினம் (2012) சங்ககால இலக்கியக் காதலும் பின்னெழுந்த பக்திக் காதலும்

கு. காரல்மார்க்ஸ் (2016) புத்தகம் பேசுது இதழ் நேர்காணல்

SlavojZizek (2016) Love as a Political Category

காதல் பயணம்

உலகக் காதலர்களே!

இந்தியாவுக்கு இனி சுற்றுலா வந்தால் ஆக்ராவில் உள்ள தாஜ்மஹாலை பார்க்க செல்ல வேண்டாம். அது ஒரு இந்(து)திய காதலின் நினைவுச் சின்னம் அல்ல.
ஏதேனும் ஒரு வீட்டின் சமையலறைக்கு செல்லுங்குள். எண்ணெய் கறை படிந்த சுவர்களைப் போல அங்கு சமைக்கின்ற பெண்ணிற்குள்ளும் சாதி காரணமாகவோ, வீட்டு கௌரவத்திற்காகவோ என மறைத்துக் கொண்ட ஒரு காதல் பிசுபிசுத்து படிந்திருக்கும்.
அந்த பிசுபிசுப்பினை உங்கள் கரங்களினால் தொட்டுப் பார்க்க வேண்டாம் என அறிவுருத்தப்படுகின்றீர்கள்.
அவள் சுடுகின்ற தோசையை சுற்றி ஊற்றப்படுகின்ற எண்ணெயைப் போல ஒரு வளையம் எப்போதும் அவளைச் சுற்றி பிண்ணப்பட்டிருக்கும். அந்த சமையலறையை கொஞ்சம் எட்டிப்பாருங்கள்.

உங்கள் அடுத்த இன்பச் சுற்றுலாவுக்கு எந்த இரயிலில் செல்ல திட்டமிட்டிருக்கிறீர்கள்.
எங்கும் நீங்கள் காதலை பார்க்கப் போவதில்லை.
வேண்டுமானால் உடனே அந்த டிக்கெட்டை கேன்சல் செய்துவிடுங்கள். அந்த இரயில் நிலையத்திலிருந்து கொஞ்ச தூரம் அங்குள்ள தண்டவாளத்தில் நடந்து செல்லுங்கள். கொலையுண்டுப்போன காதலின் பாடல்கள் தடக் தடக் என ஒலித்துக் கொண்டேயிருக்கும். உங்கள் மீசையை முறுக்கிக் கொண்டே அந்த ஓசையை கேட்டுப்பாருங்கள்.

எந்த ஊரின் கடைத்தெருவிற்கும் சென்று பாருங்கள். கூட்டநெரிசல் மிக்க அந்த வீதிகளில் எப்போதும் ஏதாவது காதலர்கள் கடந்து செல்வார்கள். அந்த காதலின் நினைவுகள் அங்குள்ள ஏதாவது ஒரு சூப்பர் மார்க்கெட்டில் சிசிடிவி கேமாராவில் பதிவாகியிருக்கும். இரத்தம் தோய்ந்த அந்த காட்சிகளைப் பார்த்து தெரிந்து கொள்ளுங்கள் இந்து இந்தியக் காதலை.

அந்த ஊரின் வெட்டவெளி மைதானத்திற்கு செல்லுங்கள். அங்கு நிர்வாணமாக்கப்பட்ட காதலர்கள் நிற்பார்கள். அவர்களை சுற்றி நின்று ஒரு கூட்டம் தாக்கிக் கொண்டிருக்கும். அதைப் பாருங்கள்.
இந்தியக் காதலை...

உங்கள் காதல் பயணம் இனிதாய் அமைய வாழ்த்துகள்.

இனி பிணங்கள் மிதக்கும் கங்கையில் மூழ்கி நீராடுங்கள்.
உங்கள் காதல் புனிதமடையட்டும்.

-- பாரதி ஆரோக்கியராஜ்

நீலத்திமிங்கலத்தின் வண்ணம்

எந்த வலையிலும் சிக்காமல்

வலைதளத்தில் உலவிக் கொண்டிருக்கும்
நீலத்திமிங்கலம்...
ஆண்பாலா பெண்பாலா
மெய்யா மெய்நிகரா
கார்ப்பரேட்களின் கூலியா
கலகம் செய்பவனா(ளா)
கற்பனையா கற்பனைகளை கட்டப்படுத்துபவனா(ளா)
அபாயகரமான இந்த நீலத்திமிங்கலம்
எந்த கடலில் இருக்கும்
உவர் நீரில் இருக்குமா
பைட்களில் இருக்குமா
அடர்ந்த வனாந்தரத்திலா
அடர்மிகு நகரிலா

அதன் கட்டளைகள் எங்கிருந்து எழுதப்படுகின்றன
நோவா பேழையிலா
குருஷேத்திரத்திலா

பள்ளி முதல் பணியிடம் வரை
உணவு முதல் ஆதார் வரை
எல்லா கட்டளைகளுக்கும்
கட்டுப்பட்டே பழக்கப்பட்ட சமூகம்
ஒரு திமிங்கலத்தின் கட்டளையை
ஏற்பதில் என்ன சங்கடம்
இந்த சமூகம் விழித்துக்கொள்ள முயல்கின்றதா
சவநிலைக்கு செல்கின்றதா

ஓட்டு போட்டுவிட்டு செல்பி எடுத்து
பேஸ்புக்கில் போட்டு முதல் கட்டளையை கடந்தவர்கள்
எத்தனை பேர் என
யாரேனும் அறிவீர்களா
செல்லாத நோட்டுகளை மாற்றிக் கொண்டு
செல்பி எடுத்தபோது அதன்
அடுத்த கட்டளையை நிறைவேற்றியதை
யாரேனும் உணர்ந்தீரா
இந்த உணவை உண்ணாதே
என சொன்னபிறகு
அந்த உணவை வைத்திருந்தனர் என
கொன்று குவித்த போது
இந்த விளையாட்டின் விபரீதத்தை
புரிந்து கொண்டீர்களா
நீலத்திமிங்கலம் கடற்பசுக்கென
சில விதிமுறைகளை விதித்து
கட்டுப்படுத்திய கட்டளைக்கு
எங்ஙனம் கட்டுப்பட்டீர்
என அறிவீர்களா
அது இருக்கும் கடலின் ஆழத்தில்
மூச்சுத்திணறி இறந்த
மீன் குஞ்சுகளையேனும் அறிவீர்களா
இன்னும் பல கட்டளைகள்
ஒவ்வொன்றிற்கும்
ஏன் ஒண்ணுக்கு போவதற்கும்
உன் அடையாளங்களை காட்ட வேண்டும்
இவ்வாறாக இன்னும் பல

இப்போது சொல்லுங்கள்
இந்த நீலத்திமிங்கல விளையாட்டில்
எத்தனையாவது லெவலை
கடந்துள்ளீர்கள்

உங்கள் விளையாட்டின் வண்ணம் அறிவீர்களா
பால் மணம் மாறா பிஞ்சுகளின் இரத்தம்
வெள்ளை மீது படிந்த சிவப்பு இரத்தம்
அதை புனிதமெனவும் நீங்கள் வணங்கலாம்
இந்த விளையாட்டில் இருந்து
எப்படி வெளியேறுவீர்கள்

- பாரதி ஆரோக்கியராஜ்
01.09.2017

சன்னல்களற்ற அறை…

இந்த புயல் நாளில்
இருண்டு போன அறையில்
நடந்து கொண்டே இருக்கிறேன்
மேலும் கீழுமாக
பரமபத விளையாட்டினைப் போல
ஏணிகளும் பாம்புகளும்
என்னோடு விளையாடிக் கொண்டிருக்கின்றன.
அந்த அறையில் இருக்கும் ஒரு சன்னல் வழியாக
எனக்கான ஒளி இருக்கின்றது.
அது என்னை விட்டு விடுதலையாக்கிவிடும்…
அந்த சன்னலை தேடுகிறேன்…
ஆனால் இங்கு சில அறைகளுக்கு
சன்னல்களே இருப்பதில்லை.
இருந்தாலும் கண்டுபிடிக்க முடிவதில்லை.
யார் அறிவார்
அந்த சன்னலில் இருந்து வரும் வெளிச்சம் கூட
என்னை மேலும் துன்பத்துக்கு உள்ளாக்கும் என்று.
அடுத்து என்ன நடக்கும் என்பதில் தானே
வாழ்வின் அர்த்தங்கள் இருக்கின்றது.
சன்னல்களற்ற அறையில்
வாழ்வது கூட சுகம் தான்.
...
பாரதி ஆரோக்கியராஜ், தரமணி, 08.56 pm 16.12.2016

பட்டாம்பூச்சி இரயில்

தரமணியிலிருந்து புறப்பட்ட

இந்த பறக்கும் இரயில் இன்று

பட்டாம்பூச்சியாக

பறந்து கொண்டிருக்கின்றது.

தேடிக்கொண்டிருக்கின்றேன்

எனக்குள் இருக்கும் என்னை

என் அன்பை

என் காதலை

என் நட்பை…!

அந்த பட்டாப்பூச்சி

உண்மையிலேயே பைத்தியக்காரத்தனமானது.

அங்கும் இங்கும் பறந்து கொண்டே இருக்கின்றது.

இரயில் பல நூற்றாண்டுகள் கடந்து

முன்னும் பின்னும் சென்று கொண்டேயிருக்கின்றது.

இந்த பிரபஞ்சம் கடந்தும்

தேடிக்கொண்டே இருக்கிறேன்…

என் தேடலில் ஒளிந்து கொண்டிருக்கின்றது

என் இருத்தலும்

உன் நினைவுகளும்.

பாரதி ஆரோக்கியராஜ், 10.11.2016, தரமணியில் இருந்து புறப்பட்ட இரயிலில்…

கருப்பு பணம் : மக்களின் மீதான கருத்தியல் வன்முறை

நவம்பர் 8, 2016 அன்று இந்தியப் பிரதமர் தொலைக்காட்சியில் தோன்றி இந்த அறிவிப்பை வெளியிடுகின்றார். இன்று நள்ளிரவு முதல் மக்களிடம் புழக்கத்தில் இருக்கின்ற 500 மற்றும் 1000 ரூபாய் தாள்கள் செல்லாது என அறிவிக்கின்றார். மேலும் இரண்டு நாட்கள் வங்கிகள், ஏ.டி.எம் மையங்கள் செயல்படாது என அறிவிக்கின்றார். ஊழல், கருப்பு பணம், தீவிரவாதம் மற்றும் கள்ள நோட்டுகளுக்கு எதிரான இந்திய அரசு எடுத்திருக்கும் வரலாற்று நடவடிக்கை என அரசு விளம்பரம் செய்து கொள்கின்றது.

இதற்கு அரசு அளித்திருக்கும் விளக்கம்:

·         இந்த வரலாற்று நடவடிக்கை மூலம் ஏழை, நடுத்தர, மேல் நடுத்தர வகுப்பினருக்கு புதிய வாய்ப்புகள் திறக்கப்படும்.

·         ரியல் எஸ்டேட் விலைவாசி, உயர் கல்வி, மருத்துவம் இனி சாமானிய மக்களையும் சென்றடையும்.

·         ஆயுத கடத்துபவர்கள், உளவு பார்ப்பவர்கள், தீவிர வாதிகளுக்கு நிதி உதவி அளிப்பது தடுக்கப்படும்.

·         மிகப்பெரிய அளவிலான கள்ள நோட்டுகளுக்கு முடிவு கட்டப்படும்.

என அறிவித்திருக்கின்றது.

உண்மையில் இந்த அறிவிப்பு என்ன மாதிரியான விளைவுகளை ஏற்படுத்தியுள்ளது. அன்றாடம் கூலி வேலை செய்யும் தொழிலாளர்களையும், நடுத்தர வர்க்கத்தினரையும் தான் பெரும் இன்னலுக்கு உள்ளாக்கியிருக்கின்றது. இன்னும் சொல்லப்போனால் சாமானிய மக்கள் மீது நிகழ்த்தப்படிருக்கும் பொருளாதார வன்முறை என்றே சொல்ல வேண்டும்.

திருவள்ளுவர் தீதின்றி வந்தப் பொருள் செல்வம் தான் அனைத்து இன்பத்தையும் அளிக்கும் என கூறுகின்றார். ஆனால் இன்று நாட்டின் பொருளாதரத்திற்கு ஒரு அச்சுறுத்தலாக இருப்பது முறைகேடாக சேர்த்து வைத்துள்ள கருப்பு பணம் என இந்திய அரசால் சொல்லப்பட்டு வருகின்றது. சுவிஸ் வங்கியில் சேர்த்து வைக்கப்பட்டுள்ள கருப்பு பணத்தை மீட்டு ஒவ்வொரு இந்தியரின் வங்கி கணக்கிலும் 15 இலட்ச ரூபாயை வங்கியில் செலுத்துவதாக வாக்குறுதி அறிவித்த இந்த அரசு இன்று செய்துள்ளது என்ன?

கருப்பு இழிவானது என்று கருதுவது அதிகாரத்திற்கும் எளிய மக்களுக்கும் இடையே நிலவிவரும் முரண்பாடு என தொ.பரமசிவன் கூறுகின்றார். அவ்வகையில் கருப்பு பணம் என்ற சொல்லாடல் முற்றிலும் சாதிய மேலாதிக்கம், இனவெறி சார்ந்த ஒன்று. ஆங்கிலத்தில் விளிக்கும் Black Money என்ற சொற்பதம் அங்கு நிலவுகின்ற நிறவெறியின் வெளிப்பாடே அன்றி வேறொன்றும் இல்லை. முறைகேடாக சேர்த்த பணத்தினை முறைகேடு என்று சொல்லாமல் கருப்பு பணம் என கூறுவது, இங்கு பொதுப்புத்தியில் இருக்கின்ற சாதீய மனப்பான்மையையே காட்டுகின்றது. இந்த சொல்லாடல் இங்கு பல்லாண்டுகளாக ஆட்சி செய்து கொண்டிருக்கும் சாதீய அதிகார மையங்கள் விளைவித்த ஒன்று. இது மக்களிடையே தொடர்ந்து ஏற்றத்தாழ்வுகளையும், அடிமை உணர்வையும் உருவாக்குபவையாக இருக்கின்றன.

ஐநூறு, ஆயிரம் ரூபாய் நோட்டுகளை செல்லாது என அறிவிப்பதினால் மட்டும் நாட்டில் இருக்கும் பொருளாதார ஏற்றத்தாழ்வுகளை களைய முடியுமா. இன்று நாட்டின் மிகப்பெரிய அச்சுறுத்தலாக இருப்பது முறைகேடாக சேர்த்து இருக்கும் ’கருப்பு’பணம் மட்டும் தானா. அவ்வாறு முறைகேடாக சேர்த்த பணம் வைத்திருக்கும் பெரு முதலாளிகள் இதனால் பாதிக்கப்படுவார்களா? என்றால் இல்லை என்றே சொல்லலாம். இன்று அரசியல் வாதிகள், அரசு அதிகாரிகள், பெரு வணிக நிறுவனங்கள் தான் முறைகேடாக பணம் சேர்ப்பதில் முதன்மையாக உள்ளன. அவர்களுக்கு இந்த அறிவிப்பினால் ஒன்றும் பெரிதாக பாதிக்கப்படப் போவதில்லை.

ஏனெனில் அவர்கள் அதை முன்பே சொத்தாகவும், வீடாகவும், நகைகளாகவும், பங்கு முதலீடுகளாகவும் மாற்றி விட்டனர். இதைவிட பெரும் அபாயம் அரசுப் பொறுப்புகளில் முறைகேடாக நியமனம் செய்யப்பட்டிருக்கும் பணி நியமனங்கள். முறைகேடாக பணிநியமனம் செய்யப்பட்டவர்கள் எவ்வித அச்சுறுத்தலும் குற்ற உணர்வுமின்றி அன்றாடம் தங்கள் வேலையை செய்து கொண்டிருக்கின்றனர். அவர்கள் மாதாமாதம் சம்பளத்தினை முறைகேடாக வாங்கி வருகின்றனர். இது கருப்பு பணமில்லையா? ஆனால் உழைக்கும் மக்கள் ஐநூறையும், ஆயிரத்தையும் மாற்றிக்கொள்ள வரிசையில் காத்துக் கொண்டிருக்கின்றனர். உண்மையில் மிகப் பெரிய அச்சுறுத்தலாக இருக்கும் இத்தகைய பணி நியமனங்கள் செல்லாது என இவ்வாறு ஒரே இரவில் அறிவிக்க முடியுமா? பணம் செல்லாது என அறிவித்த சில மணி நேரங்களிலேயே நகைக் கடைகளை மொய்க்க தொடங்கிய கூட்டத்திடம் இருக்கின்ற முறைகேடாக சேர்க்கப்பட்ட பணங்களை இந்த அரசு எப்படி மீட்கும்.

போலியான கல்விச் சான்றிதழ்களும் முறைகேடானா பணிநியமனங்களும் தான் இன்று பல இளைஞர்களின் வேலைவாய்ப்பை பறிக்கின்றன. ஆனால் அது குறித்தோ அது சார்ந்த சாதிய படிநிலைகள் குறித்தோ வாய் திறக்காத அரசு புதிதாக வெளியிட உள்ள ரூபாய் தாளில் சமஸ்கிருதத்தை திணித்து இருக்கின்றது.

பெரு நிறுவனங்கள் வாங்கியிருக்கும் கடன்களை தள்ளுபடி செய்துவிட்டு விவசாய கடன்களையும் கல்விக்கடன்களையும் வசூலிக்கும் வேலையை அதே நிறுவனங்களுக்கு அளித்திருப்பது துன்பியல் முரண். ஏழை நடுத்தர மக்களின் உயர்கல்வி, மருத்துவ வசதிகளை உறுதிபடுத்தும் என அறிவித்து இருக்கும் இந்த அரசு புதிய கல்விக் கொள்கை என அடுத்த தலைமுறையின் கல்வி கற்கும் உரிமையை பறிப்பதற்கான திட்டங்களை வகுத்து வருகின்றது. இன்று எந்த ஒரு எளிய சாமானிய மனிதனாலும் அவ்வளவு எளிதாக அப்போலோ போன்ற மருத்துவமனைகளில் சென்று சிகிச்சை பெற முடியாது. இருக்கின்ற அரசு மருத்துவமனைகளின் எதார்த்தம் முற்றிலும் வேறான ஒன்று. இதற்காக ஒரே இரவில் அனைத்து கல்வி நிறுவனங்களும் மருத்துவமனைகளும் அரசே ஏற்று நடத்தும். அதற்கு உரிய இழப்பீட்டினை ஐம்பது நாட்களுக்குள் வழங்கப்படும் என்ற அறிவிப்பினை இந்த அரசு இப்படி ஒரே இரவில் அறிவித்து செயல் படுத்த முடியுமா?

அரசின் ஆதிக்கமும் அடக்கு முறையும் என்பது எளிய மக்களின் மீதே ஒழிய பெரு முதாலாளிகளிடமோ பார்ப்பனர்களிடமோ இல்லை. ஏனெனில் இன்று நிகழ்த்தப்பட்டிருப்பது எளிய மக்களின் மீதான கருத்தியல், பொருளாதார வன்முறை. இதில் எந்த நியாயங்களையும் காண முடியாது.

அ.ஆரோக்கியராஜ்

முனைவர் பட்ட ஆய்வாளர், இதழியல் மற்றும் தொடர்பியல் துறை, சென்னைப் பல்கலைக் கழகம்.

கூட மேல கூட வச்சி கூடலூரு போறவளே

காலம் கடத்துவேனோ!

ஆண்: கூடை மேல கூடை வச்சி

மொழுந்தெடுக்கப் போற புள்ளே - உன்னைக்

கொள்வோன் மனம் குளிர

கொஞ்சம் நின்னு பேசேன்டி.

பெண்: அக்கம் பக்கம் பாராமல்

அதிகாரம் பேசும் மச்சான்

ஆனாலும் ஆகட்டும்

அடுத்த நாள் பேசிருவேன்.

ஆண்: முத்துப் போல பல்லழகி

முகங் கோணாச் சொல்லழகி - என்னைக்

கண்டாக் கசக்குதோடி

கருத்து ஒண்ணு ஆன பின்னே.

பெண்: கண்டால் கசக்காது

கருத்துள்ள அத்தானே - நான்

ஊரார் நகைக் கஞ்சி

ஓடுகிறேன் வெகுதூரம்.

ஆண்: கொள்ளை ஆசை உனக்குண்டு

கொண்டு வாரேன் பரிசப் பணம்

உன் தந்தை தட்டினாலும்

ஒரு சொல்லில் முடித்துவிடு.

பெண்: பரிசப் பணம் கொண்டு வந்தால்

பார்த்துக் கொள்வேன் அத்தானே

பாவி நான் வாடும்படி

காலத்தைக் கடத்தாதே!

ஆண்: காதலாலே வேகுறேனே

கண்ணான பெண் மயிலே

காலங் கடத்துவேனோ

காத்திருந்தும் பார்ப்பேனோ!

(எஸ். எஸ். போத்தையா அவர்களின் தொகுப்பிலிருந்து…)

நான் பார்த்தலின் பொருட்டு

நான் பார்த்தலின் பொருட்டு

நான் அழகை பார்த்து ரசிப்பதனால்
ஒன்றும் ஏற்படுவதில்லை
என் பார்வை அதன் அழகினால் நிறைந்தது
உடல், செவ்விதழ், வனப்பான அங்கங்கள்
கிரேக்கத்து சிலைகள் போன்ற கருங்கூந்தல்
அது அள்ளி முடியாத போதும்கூட பேரழகு
நெற்றி நுதல் படும் முடி கூட அழகு
எனது கவிதை போல அந்த முகங்கள்
எனது பால்ய இரவுகளில் இவற்றை விரும்புகிறேன்
ரகசியமாக சந்திக்க

Translated by Bharathi Arockiaraj

So much I gazed - Cavafy

So much I gazed on beauty
That my vision is replete with it
Contours of the body, Red lips, voluptuous limbs,
Hair as if taken from greek statues;
Always beautiful, even uncombed,
And it falls, slightly, over white foreheads,Faces of love, as my poetry
Wanted them…
in the nights of my youth,
In my nights, secretly, met…

காதலுக்கான அழைப்பு - பால் லாரன்ஸ் டன்பார் (1897)

Invitation to Love

Related Poem Content Details

BY PAUL LAURENCE DUNBAR

Come when the nights are bright with stars 

Or come when the moon is mellow; 

Come when the sun his golden bars 

Drops on the hay-field yellow. 

Come in the twilight soft and gray, 

Come in the night or come in the day, 

Come, O love, whene’er you may, 

And you are welcome, welcome. 

You are sweet, O Love, dear Love, 

You are soft as the nesting dove. 

Come to my heart and bring it to rest 

As the bird flies home to its welcome nest. 

Come when my heart is full of grief 

Or when my heart is merry; 

Come with the falling of the leaf 

Or with the redd’ning cherry. 

Come when the year’s first blossom blows, 

Come when the summer gleams and glows, 

Come with the winter’s drifting snows, 

And you are welcome, welcome. 

நட்சத்திரங்கள் ஒளிரும் இரவிலோ
நிலவு காயும் பொழுதிலோ
களத்துமேட்டில் செவ்வானம் சிவக்கும் பொழுதிலோ
நீ வா, ஒரு ஒளிக் கீற்றைப் போல
...
கருக்கல் வேளையிலோ
சாமத்திலோ, பகல் பொழுதிலோ
அன்பே நீ எப்பொழுதினும் வரலாம்
நீ வரவேற்கப்படுகிறாய்
...
இனிமையான அன்பான காதலே
மென்மையான கூடடையும் புறாவே
படபடக்கும் என் நெஞ்சுக்கு அமைதியினைக் கொடு
என் இதயக்கூட்டிற்கு நீ வரவேற்கப்படுகிறாய்.
...
என் அலர் பொழுதிலும்
என் உள்ளக் களிப்பிலும்
உதிர்ந்த இலைகளோடும்
சிவந்த அத்திப் பழத்தோடும் வந்துவிடு
...
வசந்த காலத்தின் முதல் பூவாக
கோடையின் கனன்றெழும் முதல் ஒளிக்கீற்றாக
வாடையின் கதகதப்பான பனிப்பொழிவாக
வந்து விடு, நீ என்றென்றும் வரவேற்கப்படுகிறாய்
...
தமிழில்: பாரதி ஆரோக்கியராஜ்

கந்தக வெண்ணிலா

தோதான இடத்தில் நீ இருந்தால்

நான், எரியும் கந்தக மாளிகையை உனக்குத் தருகின்றேன்

அதன் ரேழி எங்கும் அபாயங்களும்

அங்கு எரியும் நெருப்பினில் இருந்தும்

தப்ப முடியாத ஒர் மாளிகை…

நம் இருவரையும் கடத்தக் கூடிய மாளிகை...

தென்றல் தழுவும் பூஞ்சோலையில் நீ இருந்தால்

நெகிழியில் ஒரு தோட்டம் தருகின்றேன்

அந்த சுடு மணலில் நடனமாடிடு…

ஒரு துளி இதயம்

பேரலைத் தாகம்

பருந்தென வாழ்க்கை எனக்கு

தீயினில் இருந்து விலகிச் செல்கிறேன்

இந்த கனாவினிலே…

கனவினில் இருந்து விழித்துக் கொள்கிறேன்

அறியாத குரலினிலே...

நீ உறங்கு நான் மட்டும் கனவு கண்டுக் கொள்கின்றேன்

அமைதியான ஒரு கடவுளைப் போல...

வெண்பனிக் குளிரில்

போர்த்திக் கொள்ள ஏதுமில்லை.

கோரமான இரவில்

இந்த மரணத்தை மறைப்பது மிகவும் துன்பமானது.

https://vimeo.com/13578330

பாடல் : Mia pista apo fosforo (1990)

பாடியவர் : ஹாரிஸ் அலேக்சியோ (Haris Alexiou) 

தமிழில் : பாரதி ஆரோக்கியராஜ்

மாமதுரை போற்றுதும்…

புகைப்படக் கலைஞர் ஹென்க் ஓச்சப்பனுடன் ஒரு நேர்காணல்

- அ. ஆரோக்கியராஜ்

”தமிழர்களின் பாரம்பரிய விளையாட்டான சல்லிக்கட்டு, தமிழக பண்பாட்டின் ஆன்மாவினை உள்ளடக்கியுள்ளது. சல்லிக்கட்டுக்குத் தடை என்பது மக்களை பண்பாட்டு அநாதையாக மாற்றுகின்றது” என பெல்ஜியம் நாட்டு புகைப்படக்கலைஞர் ஹென்க் ஓச்சப்பன் மதுரை குறித்த தமது அனுபவங்களைப் பற்றி பேசுகையில் இவ்வாறு தனது உரையாடலைத் தொடங்குகிறார். மதுரை நகர் மற்றும் அதனைச் சுற்றியுள்ள கிராமப்பகுதிகளின் மரபார்ந்த ஆன்மாவினை தனது கேமரா மூலம் படம்பிடித்து வருகின்றவர். மதுரை நகரில் உள்ள பெருவாரியான மக்களுக்கு பரிச்சயமானவர். இருபது ஆண்டுகளுக்கும் மேலாக மதுரையைச் சுற்றியுள்ள கிராமப்புறங்களின் வாழ்வியலை புகைப்படங்களாக பதிவு செய்து வருபவர். சல்லிக்கட்டு ஆதரவாளர். அவருடனான ஒரு நேர்காணல்…

1. அது என்ன பெயர் ஹென்க் ஓச்சப்பன்…?

1994ஆம் ஆண்டு நானும் எனது நண்பனும் கொடைக்கானல் செல்வதற்காக வந்திருந்தோம். மதுரையிலிருந்து கொடைக்கானல் செல்லும் பேருந்தில் பயணிக்கும் போது எங்களுடன் ஒரு ரிக்‌ஷா ஓட்டுநரும் பயணித்தார். அவர் கொடைக்கானலில் படிக்கும் தன் பிள்ளைகளுக்கு திண்பண்டங்களை வாங்கிக் கொண்டு அவர்களை பார்ப்பதற்காக பள்ளிக்கு சென்று கொண்டிருந்தார். எனக்கு தமிழ் கற்றுக் கொள்ளும் ஆர்வத்தில் எல்லோருடனும் இயல்பாக பேசி வந்தேன். அவ்வாறு அவருடனும் பேசிக்கொண்டு வந்தேன். அவருடனான அந்த பயணம் மறக்க முடியாத ஒன்றாக அமைந்தது. அவரிடம் உங்களை மதுரையில் எங்கு சந்திக்கலாம் என்று கேட்டேன். மீனாட்சி அம்மன் கோயிலுக்கு அருகில் இருந்த சென்ட்ரல் மார்க்கெட்டில் வந்தால் என்னை பார்க்கலாம் என்று சொன்னார். கொடைக்கானலில் எங்களின் வேலை முடிந்த பிறகு மதுரை வந்து அவரை சந்திக்கச் சென்றேன். அவர் மதுரையின் பல பகுதிகளுக்கு என்னை அழைத்துச் சென்றதோடு மட்டுமல்லாமல் எனக்குத் தமிழ்மொழியையும் கற்றுக்கொடுத்தார். அவருடைய நட்பு எனக்கு மிகவும் மகிழ்ச்சியளித்தது. அவருடைய பெயர்தான் ஒச்சப்பன். அதைத்தான் ஓச்சப்பன் என என் பெயரோடு சேர்த்து ஹென்க் ஓச்சப்பன் என மாற்றிக்கொண்டேன்.

# ஒச்சப்பன் என்ற பெயர், உச்சாண்டம்மன் என்ற அம்மனின் பெயரில் இருந்து வழங்கி வரும் பெயர். பெண் பிள்ளைகளாக இருந்தால் ஒச்சாயி, ஒச்சம்மாள் என்றும், ஆண் பிள்ளைகளாக இருந்தால் ஒச்சப்பன் என பெயரிடுவது வழக்கம். உச்சாண்டம்மன் என்பது தேவர் சமூகத்தினரின் ஒரு குல தெய்வப் பெயர்.

2. உங்களைப் பற்றியும் உங்கள் இந்திய பயணங்கள் பற்றியும்…

நான் பெல்ஜியம் நாட்டின் அஸ்ட்வெர்ப் நகரைச் சேர்ந்தவன். ஜேக்கப் – டேனியல் பெட்ரோனெல்லா எனது பெற்றோர். நான் கட்டடக் கலை பயில ஆசைப்பட்டு கல்லூரியில் சேர்ந்தேன். ஆனால் அந்த வயதில் எனக்கு ஏற்பட்ட சிறுநீரகக் கோளாறு காரணமாக எனது படிப்பைத் தொடர முடியவில்லை. அதனால் படிப்பைப் பாதியிலேயே விட்டுவிட்டேன். பின்பு சிறைத் துறையில் வேலைக்கு சேர்ந்தேன். சிறைத்துறை அதிகாரியாக பணியாற்றி ஓய்வு பெற்றுவிட்டேன். இப்போ எனக்கு வயது 66 ஆகின்றது.

நான் 1987 ஆம் ஆண்டு முதன் முறையாக இந்தியாவிற்கு வந்தேன். பாண்டிச்சேரியில் உள்ள அரவிந்தர் ஆசிரமத்திற்குத் தான் நான் முதலில் வந்தேன். அதன் பிறகு ஒவ்வொரு ஆண்டும் நான் இங்கு வந்து கொண்டிருக்கின்றேன். நான் இந்தியாவில் புது தில்லி, ராஜஸ்தான், பாட்டியாலா, கல்கத்தா, டார்ஜிலிங், வாரணாசி, ஹரித்வார், ரிஷிகேஷ், மைசூரு, பெங்களூர், கேரளா உள்ளிட்ட பல நகரங்களுக்குச் சென்று வந்திருக்கின்றேன். புது தில்லியில் உள்ள அனைத்து சமணப் பள்ளிகளுக்கும் சென்றுள்ளேன். இருப்பினும் எனக்கு மிகவும் பிடித்த இடம் தமிழ்நாடு. குறிப்பாக மதுரை. நான் கடந்த பிறவியில் தமிழனாக பிறந்திருப்பேன் என அடிக்கடி எனது மதுரை நண்பர்களிடம் கூறுவேன். அந்த அளவுக்கு எனக்கு மதுரை பிடித்துள்ளது. தமிழ்நாடு என் இரண்டாவது தாய் நாடு.

எனக்கு பைக் ஓட்டுவது மிக பிடிக்கும். மதுரையிலிருந்து ராமேஸ்வரம், பின் அங்கிருந்து கேரளா–ஆலப்பி, மூணார், வால்பாறை ஆகிய இடங்களுக்கு எனது பைக்கிலேயே சென்று வந்துள்ளேன். இந்திய சாலைகளில் வண்டி ஓட்டுவது கொஞ்சம் சவாலனது தான். ஏனெனில் இங்கு போக்குவரத்து நெருக்கம் மிகுந்து காணப்படுகின்றது. டெல்லி சாலைகளில் இரு புறங்களிலும் மூன்று வழிப் பாதைகள் இருந்தாலும் யாரும் அதை பின்பற்றுவதில்லை. அந்த அளவுக்கு நெரிசல் மிகுந்த சாலைகளாக உள்ளன. அதில் ஹெல்மெட் அணிந்து கொண்டு வண்டி ஓட்டுவது இன்னும் கொஞ்சம் சவால்தான். ஏனெனில் இது போன்ற சாலைகளில் வண்டி ஓட்டுவதற்கு அகண்ற பார்வைக் கோணம் தேவைப்படுகின்றது. ஹெல்மெட் போடுகின்ற போது பார்வை அளவு குறைவாகத்தான் உள்ளது. சட்டென்று திரும்பிக் கூட பார்க்க முடியாத சூழல். இருந்தாலும் உயிர் காக்க ஹெல்மெட் அணிவது கட்டாயம் என்ற தேவையை உணர வேண்டியுள்ளது.

3. மதுரை பற்றி…

மதுரையில் முதலில் எனக்கு பிடித்தது, மக்கள் மரியாதையோடு பழகுவது தான். தமிழகத்தின் தலைநகரமான சென்னையைக் காட்டிலும் மதுரை மக்கள் மரியாதையோடு பழகின்றனர். இங்கு விருந்தினர்களை உபசரிக்கும் பண்பு மிகவும் மரியதைக்குரிய ஒன்றாக உள்ளது. அது எனக்கு மிகவும் பிடித்துள்ளது. மேலும் குடும்ப உறவுகளுக்கு தமிழர்கள் அளிக்கின்ற மரியாதைக் குணம் என்னை மிகவும் ஈர்த்தது. அண்ணனின் முன்பு தம்பி சிகரெட் கூட பிடிப்பதில்லை. மதுரையில் மிகவும் என்னை ஈர்த்தது, மரபு, மதிப்பு, மரியாதை.

ஆனால் இங்குள்ள மக்களிடம் தொலைக்காட்சிகளும் திரைப்படங்களும் ஒரு மிகப் பெரிய பிழையை உருவாக்கி வைத்துள்ளது. வெளிநாட்டில் இருந்து வருகின்ற பெண்களை ஒரு காமப் படத்தில் வருகின்ற நாயகியைப் போல பார்த்து வருகின்றனர். அந்த பிழைக்கு மிக முக்கிய பொறுப்பு ஊடகங்கள் தான்.

4. மதுரை உங்களுக்கு பிடிக்க காரணம்…

என்னைப் போன்ற வெளி நாட்டினர் மதுரைக்கு வந்தால் மீனாட்சி அம்மன் கோயிலைத் தான் சுற்றி பார்க்க விரும்புவர். ஆனால் எனக்கு அது மட்டும் போதுமானதாக இல்லை. ஒரு நகரின் ஆன்மா என்பது அதனைச் சுற்றியுள்ள கிராமங்களில் தான் இருக்கின்றது என நம்புபவன் நான். அங்கு தான் மக்களின் உண்மையான அடையாளத்தையும், எதார்த்தமான இயல்பையும் காண முடியும். ஆக நான் மதுரையைச் சுற்றியுள்ள கிராமங்களை நோக்கி எனது பயணத்தைத் தொடர்ந்தேன்.

இங்குள்ள கிராமங்களில் மக்கள் தங்கள் மரபையும் அதன் அடையாளங்களையும் இன்னும் பாதுகாத்து வருகின்றனர். இதற்கு மூன்று காரணங்கள் அடிப்படையாக உள்ளது. 1. குடும்பம்: உறவுகளை பிணைத்து வைக்கும் மிக முக்கியமான அம்சமாக இங்கு குடும்ப கட்டமைப்பு இருக்கின்றது. ஆணுக்கும் பெண்ணுக்கும் இடையே உள்ள பந்தம், பெற்றோர் பிள்ளைகளுக்கு இடையே உள்ள பாசம் என்பது உறவுக்கான காப்பீடாக உள்ளது. 2. மதம்: மேற்கத்திய நாடுகளில் மதம் என்பது தனித்த ஒன்றாக உள்ளது. ஆனால் இங்கு மக்களின் வாழ்வில் ஒன்றுடன் ஒன்றாக கலந்திருக்கின்றது. பொட்டு வைத்தல், திருநீரு பூசுதல், பூ வைத்துக் கொள்ளுதல் என சின்னச் சின்ன நிகழ்வுகளிலும் மதத்தின் பிரதிபலிப்பு தெரிகின்றது. இது சமுக பிணைப்பை உறுதி செய்கின்றது. 3. நாட்டாரியல்(Folk lore): இங்கு கடவுள் மனிதரால் உருவாக்கப் படுகின்றது. இங்கு இன்னும் அதிகமாக மக்களின் பூர்வீகமான மரபு பின் தொடரப் பட்டு வருகின்றது. இது கிராமங்களை இன்றும் உயிர்ப்புடன் வைத்திருக்கச் செய்கின்றது என நான் கருதுகின்றேன்.

5. மதுரை நகரின் தெருக்களைப் பற்றி…

மதுரை நகரின் தெருக்களில் மக்களுக்கு இடையேயான சமூகத்தொடர்பு எனக்கு மிகவும் பிடித்துள்ளது. எனது நாடானா பெல்ஜியத்தில் வீடு, அலுவலகம், ஹோட்டல் ஆகிய இடங்களில் தான் மக்கள் பேசிக் கொள்வர். அங்கு தெரு என்பது வெறும் பயணிக்கின்ற ஒரு இடம் மட்டுமே. இதே நிலை தான் அங்குள்ள கிராமங்களிலும். வீடு, விவசாய நிலம் என மட்டுமே. சாலையில் நடந்து செல்லும் போது கூட பேசிக் கொள்வது அரிது. நான் எனது நாயுடன் நடைப் பயிற்சி செல்லும் போது முதலில் எனது நாய்க்கு தான் ஹாய் சொல்லுவார்கள். அதன் பிறகு வேண்டுமானால் என்னுடன் பேசுவர். ஆனால் இங்கு அப்படியில்லை. சமூகத்தின் எல்லா நிகழ்வுகளும் தெருக்களில் தான் நடக்கின்றது. இங்கு மக்களிடையே சமூகத் தொடர்பு அதிகம் உள்ளது. எதிர்படும் மனிதர்களிடம் இயல்பாக என்னால் பேச முடிகின்றது. மேலும் என்னிடம் இருக்கும் கேமரா மூலம் அவர்களை படம் எடுக்கும் போது அவர்களும் என்னுடன் சகஜமாக பேசத் தொடங்குகின்றனர். என்னுடைய நாய்க் குட்டியைப் போன்று இங்கு கேமரா செயல்படுகின்றது.

மேலும் இங்கு தெருக்கள் மிக அழகான ஒன்றாக இருக்கின்றது. குறிப்பாக கிராமங்களில். மேற்கத்திய நாடுகளில் அழகியலோடு வரையப்படுகின்ற சுவரோவியங்கள் (Graffiti) போன்று இங்கு பெண்கள் வாசலில் கோலம் போடுவது ஒரு கலைத் தன்மையுடயதாக (Street Art) இருக்கின்றது. கோயில் சுவர்களும் அப்படியே. அதில் உள்ள கோடுகள் மிக அழகாக இருக்கின்றது. இப்படியிருக்க இன்னொரு புறம் தெரு என்பது உண்மையில் மாசு பட்டு இருக்கிறதென்றே கருத முடிகின்றது. மிகப் பிரம்மாண்டமான ஃப்ளெக்ஸ் பேனர்கள், சுவர்களில் வரையப்படும் விளம்பரங்கள் என தெரு தனது அடையாளத்தை இழந்து வருகின்றன எனக் கருத முடிகின்றது. எங்கள் நாட்டில் வீட்டு சுவரில் யாராவது அநாவசியமாக விளம்பரம் செய்யும் பொருட்டு பெயிண்ட் ஸ்பிரே கொண்டோ அல்லது பெயிண்ட் மூலமாகவோ ஏதாவது கிறுக்கி மாட்டிக் கொண்டால் அந்த நபர் அதை அழித்து விட்டு மீண்டும் அதே போல் பெயிண்ட் அடித்து தருவதற்கான மொத்த செலவையும் ஏற்க வேண்டும். ஆனால் இங்கு சில நிறுவனங்கள் தங்களை பிரபலப் படுத்திக் கொள்வதற்காக மக்களின் தனிப்பட்ட இடங்களான வீட்டுச் சுவர்கள், பொது வெளிகளைப் பயன்படுத்துவது மக்களின் மீது தங்களது கருத்துகளை திணிப்பதாக இருக்கின்றது.

இங்கு தான் ஒரு பொருளுக்கு அதிகப் படியான விளம்பரங்களைக் காண முடிகின்றது. எங்கள் நாட்டில் நாங்கள் ஒரு பொருளை வாங்கும் போது அந்த பொருளின் விலையை ஒப்பிட்டு பார்த்து, அதன் நிறை குறைகளை அறிந்து அதன் பிறகு பொருட்களை வாங்குவோம். ஆனால் இங்கு அதிகப் படியான விளம்பரங்கள் மக்களை அந்த பொருளை வாங்கச் சொல்லி திணிக்கின்றது. மக்களை எக்ஸ்ப்ளாய்ட் (exploit) செய்கிறது. மக்களின் ரசிக மனோபாவம் மிக உச்சமாக இருக்கின்றது.

6. அதிகமான சமணப் பள்ளிகளுக்குச் சென்று வந்துள்ளீர்கள். சமண சமயம் பற்றியும் தமிழர் வழிபாட்டு முறைகளைப் பற்றியும் உங்கள் கருத்து?

சமணமும் பௌத்தமும் சம காலத்தில் உருவான சித்தாந்தங்கள். அவை மதங்கள் அல்ல. அவை வாழ்வை மேம்படுத்துகின்ற தத்துவங்களைக் கொண்டவை. ஆனால் இந்துத்துவம் என்பது மதம். வாய்வழிக் கதைகள் இலக்கியங்களாக புராணங்களாக மாறி கடவுள் என்ற கட்டமைப்பில் உருவானது. பிரம்மா என்ற கடவுளில் இருந்து இந்து மதம் தனது கடவுள்களை விரிவு படுத்திக் கொண்டுள்ளது. திராவிடர்கள் இயற்கையை வழிபட்டவர்கள்.

இந்து மதம் நான்காம் நூற்றாண்டில் இந்தியாவில் பரவ ஆரம்பித்தது. சமணம் மற்றும் பௌத்த மதங்களை அழித்து வளர்ந்தது. ஆனால் திராவிடர்கள் தங்கள் பண்பாட்டை இன்னும் முற்றிலுமாக இழந்து விடவில்லை. இன்றும் விவசாயிகள் அவற்றை பின்பற்றி வருகின்றனர். கார்த்திகை தீபம் என்பது தமிழர்களின் பாரம்பரியமான ஒரு பண்டிகை. அது போல ஹோலிப் பண்டிகையை என்பது மிக நுட்பமாக நோக்கினால் அதன் அடிப்படை திராவிடம் என்பது புரியும். நான்காம் நூற்றாண்டில் இந்து மதம் எல்லா ஆவணங்களையும் அழித்தது. ஆனால் சமணர்கள் தங்களது ஆவணங்களைப் பாதுகாத்து வந்துள்ளனர். அதை இன்றும் கூட நூலகத்தில் பாதுகாத்து வருகின்றனர் சமணர்கள்.

7. ஜல்லிக்கட்டு குறித்த உங்களின் நிலைப்பாடு?

ஜல்லிக்கட்டு விவசாயிகளின் மிகவும் பழமையான விளையாட்டு. இது தமிழக கிராமங்களின் ஆன்மாவினை உள்ளடக்கியுள்ளது. மக்களின் பாரம்பரியமான பண்பாடுதான் அந்த சமூகத்தின் ஆன்மாவாக உள்ளது. ஒரு தேசம் தனது ஆன்மாவினை தொலைத்துவிட்டு எதை நோக்கி பயணிக்கின்றது? பாரம்பரிய பண்பாட்டினை இழந்த தலைமுறையினர் பண்பாட்டு அநாதைகளாக கருதப்படுவர்.

8. PETA போன்ற அமைப்புகள் ஜல்லிக்கட்டு விளையாட்டுக்குத் தடை கோரி வழக்குத் தொடர்ந்து போராடி வருகின்றன. இவ்விளையாட்டு எருதுகளை கொடுமைப் படுத்துவதாக கூறிவருகின்றனர். அது குறித்த உங்கள் கருத்து?

அமெரிக்காவைச் சேர்ந்த PETA என்ற மிருகநல அமைப்பு ஜல்லிகட்டுக்கு எதிரான வேலைகளை மும்முரமாக மேற்கொண்டு வருகிறது. ஜல்லிகட்டுக்கு தடைவாங்க முக்கிய காரணமாக விளங்கியதும் இந்த PETA அமைப்புதான். அமெரிக்காவில் ஒவ்வொரு வருடமும் பல்லாயிரக்கணக்கான நாய் குட்டிகளையும் பூனைக் குட்டிகளையும் கொல்லும் இந்த PETAவிற்கு ஜல்லிகட்டு பற்றி பேச என்ன அருகதை இருக்கிறது? மாடுகளை மனிதர்கள் வளர்க்கவே கூடாது, பால் அருந்தவே கூடாது மாடுகளை கொண்டு சென்று காடுகளில் விட்டு விட வேண்டும் என்று கூறும் இந்த PETA அமைப்பு நம் விவசாயிகளின் எதிரி. தமிழர்களின் எதிரி.

சல்லிக்கட்டு என்பது காளைகளை வதைக்கும் ஒரு விளையாட்டு அல்ல. சல்லிக்கட்டு விளையாட்டுக்காகவே நன்கு பயிற்சி அளிக்கப்பட்ட பிறகுதான் களத்தில் இறக்கப்படுகின்றது. அமெரிக்காவில் எருது பிடி விளையாட்டில் நடைபெற்று வந்து சூது காரணாமாக அங்கு இந்த அமைப்பு போராடி தடை வாங்கியது. அதே மனோநிலையில் சல்லிக்கட்டு விளையாட்டையும் PETA (இந்தியா) அமைப்பு அணுகி வருகின்றது. இங்கு சல்லிக்கட்டு என்பது பண்பாட்டின் ஆன்மா என்பதை உணர வேண்டும்.

நன்றி: தின இதழ், 13-14, சனவரி, 2016